percakapan anak sibatang lino dan anak lolo

Eeeee.......

Iami anne caritana tau tallasa rilinoa battu riallo ribokona anak sibatang

Riwattuna ero lassu taua rilino ilalang alang arawa accaritaimi ana’ loloa siagang patanna lino na ahera, riwattuna nipasiguppai je’ne mangkudua ilalang kambungna bainena simula tau, passiguppa nanjarina je’ne accera dageng, nacaritami anak sibatang lino mange ri anak loloa, tallu saba kabattua si mula njari battu ri kamateanga. Mate dalle mange ridallekang tallasa dalle mange riboko, risa’ri nakupasangmi kalengku, ya anak sibatang lino carita riolo rioloji nakunicarita.....

Akkanmi anak loloa, rilno kabattuangku apa nakucini kodi na baji’na tau narupa tauku

Akkanami anak sibatang lino, iapa nabaji linoa mingka nia tallu lassu pinawangi simula jarinu

Nabalasa’mi anak loloa, takujappui kananta ya anak sibatang lino

Eeeeeee...... eeee....

Tallu cappa parallu nupahang ya anak lolo, mingka iami anne tallu cappa ngerangi saba’na tallasa namatenu, saba’na baji na kodina rupa tau rimatanna tau, saba’na iami anne rotasa na russa’na tompo lino

Naia nakke anak jari-jarinnta ya anak sibatang lino

Eeee..... eeeee......

Jappui na pahangi baji-baji ya anak lolo

Cappa laso, cappa laso yami antu panjari na kabattuanna taua

Cappa badik , iami antu pasigguppana tau simula-mula ritompo butta kajariangku ri lino

Cappa lila, iami antu salla angerangi parannu rupa tau sicini olo’-olo’ ri tompo buttaku

Ya..... anak sibatang lino,,, naia nala’bu umuru anciniki tallua kabattuang mabaji na kodia ri palippisi matangku, mingka apaka nagaukang batang kalengku

Eeeeee...... eeee......

Kau tarang mingka a’lebu tanja’nu

Kau cidu’ mingka posso tanja’nu

Kau bura’ne mingka takuisseng jarinu

Je’ne lalo

Je’ne kantala

Tanaisseng larro mingka gunturu lalona

Tanaisseng garring mingka bosi lalona

Ya anak sibatang kabattuangku

Bulu laloku mingka tana timboi poko’-poko’

Batu rikallongku mingka jepe’ singkammana dageng manu’

Jagaia mingka nakke kabattuannu, kaeng alusu sirupa-rupanna bone kambungku

Ya anak sibatang kabattuangku

Eeeeee..... eeee......

Eja rupangku na laccu takkulea rampei kalengku, nakkemi anne tanja tanjari, anak simula-mula, limangku takkangkang ad’alle nai ya anak sibatang

Kau anak loloku jaring tangngisseng sala nakucaritami cappa maka rua rilomponu

Anak sibatang lino panjariku, toli naati nupanjari rikalengke naia nakke anak simata-mata alusu laloku

Naimi anne cappana batara na nyili timo, batara lassu ri lino kupasoso battu rilangi kupasiguppa tamma timo’ kupabua ri boting lino. Ritangnga kajarianna ilalang kulambu kebo’ na raukang langga papang jatia, nacini’mi ya tarang na possoka rikalenna ya batara, kau tamma timo ri tangga batang kelennu kupadongko bunga langngoting na batu tua’. Jagai langngoting batu tua’nu ripaccini’na rupa tau

Ya anak sibatang panggisengangku tanala’bi lisere sara ri ulu na atingku

Riwattunna sigappa cidu’ na posso siagang bunga langngoting ridolangang malompoa, nasa’bumi hurupu mingang lompoa tamma timo rilinoa, takkaluppa mingka inga’ tanacini kalengna lusu tanja ta’bulala matanna.

Kau ridallekang linoku lompo bulu lompo battang

Poko attang bangngi rateanna sagalayya

Lolo rimarannia sagalayya

Purasa ri raung kajua

Kodi tanja mabaji’na ia sagalayya

Pammoporanga ri cappa’na ma’dallekang

A’jenne ri gallanga bulaenga

Iami anne pabattu hurufu paling malompoa 

Eee...... eeee.......

Nia’mi sallakku battu rikalengku riwattunna battu nappasaku kasa’ringang ribukkulengku saba’ kalennu kambunna lino nipadongko a’dalle mange ripattimbona matangku mata alloa na alusukku ri tallanna mata alloa, cima’ nyawaku ngerangi alusu’na rasa na pakkio’na tarangna bulanga, kuputara linoa kupaccini tallasa’na tanici na’rupayya ridallekanna salama’ cappa badi’na ya anak sibatang kale

Ianakkemi anne purasa raung kaju ritimoro’ rupanna tamanjaria, bara’ kucini lalo salamaka rikananna, na kukasia saba’na kananna ilakebo takacinikang

Nakupacinikangmi kabara’ battuna matena taua ri cappa lilana, kupaerakangi bujung tammati ri tompo langi’-langi’nu na tana salai je’ne simata-mata la’bui tallasa’nu

Iami anne cappa tanataba buku risa’ri naritanggana mingka russa’ na matea lassu ri cappa’na

Ikau lapute ri anak sibatang kale

Basa cappa’nu cidu’ larina

Rangko poko’na russa’ jarinna

Kupake sai pake-pakena

Kudongko sai dongko’-dongkokanna

Kupaenteng sai lalona jenneka

Kupa’rappung cidu’ na posso kodi tanja mabaji’na ya sagalayya

Sokonga matinggi

Tarang lappa’na kulappa kana

Napunna salla nusombala’mi sarennu pinawangngi alusukku

Jagai tarangku

Parammaki ya kodi tanja mabaji’na ya sagalayya

Eeee..... eeee.....

Lassu mako rilino 

Sallang katallasang (kelhiran)

iami anne karaenna lino kudongkoki

lassu ngerang appa sulapa ri bukkulengku

matanna alloa cappa paccinikku

poko’na lino kukkulu kasarakku

terasa’na anging nyawa tabattuku

bujung tammatti tompo’ langi’-langikku

batu ilalang bassi kalling ipantarang rante bassi panggala-gala cera

eru’ mata mbangung ciniki tallasa na nu nubojayya

nurampe anging

ri ulu anging

ambangungku nuci’na tallasa assulapa rikabattuannu

naiya ero’na bukkuru ialalang kappara pangngadakkang

nuturuki kanangku

nupinawang erokku

ku bangungan poko’ sibatang lino ammenteng tattara ngolo mange ri coppo langi

a’baju mancambulo

ibara’na tompo bulu taruntungngi gunturu

tanakanre bu’bu tanasa’ring cima’ tana tumbusu bambang

kukkulu baja rokkoki sare-sarenna bulo liu

ura’ gallang patinroi labuna mata alloa

mani tambaga pao’lei pakkasianna billisi

cera’ bassi kalling pabattu sallang tamatappuna anak sibatang lino

tanuguppa pasara’ lompoa mingka tanuboja a’runganna

tanucinika mingka pasara’ lompoa timbo ribukkulengke

tanusa’ringa poko-poko, aka’nu kupakalu kupanjari kalasa anak sibatang lino ri kalengku

siguppa dongko na battang (pernikahan)

riwattunna ku rampe singara’ bulang akkare’-karena

mabaji’ kuissenna bintoeng silage-laga ri kulambu

raung kaju siri’ ngakui kalenna

singkammua le’ba hadele’ nairi’ anging

kupa’niami singara na pattang

mata allo na bulang

lino na bintoeng

ambangung natinronu

katulu-tulu ri sadara’nu

ku iri’-iri sai sa’be-sa’bena pakkarenayya

kudonko-kondokang dongkona tunrung limayya

e,,,, takucini lappa lipa’nu, takusa’ri donko pa’lungannu

iapa nakkasia natabapi ere mangkudu ri kambungku

kasiasi lamung-lamungku tanataba bosi ribaraka

pappisa’binna malaika’ pambe’bu nyawa takukasia

iapa kurupai kalengku anjaripi linoku accairi rikalengku

iapa kukasia garringnga tanatabapa sioro allo ri butta malompoku

kabattuangku liwa’ baji’na

tinro mako bara’ nairi jako anging mabaji

ambangung mako bara’ ambangungji suku-suku ribangkennu

bara’ nia’ toji baji kurampe ritallasa na me.teku

Rudini. M